خبريں اردو سے محبت کرنے والوں کے لۓ

پاکستان میں تعلیمی انقلاب، اساتذہ کے استحصال کے خاتمہ سے مشروط

کاشف اسد

یہ بات اب حقیقت بن کر سامنے آ رہی ہے کہ ہم نے پاکستان میں تعلیم کی ترقی کے لیے کچھ نہیں کیا فوجی حکومت ہو یا جمہوری حکومت ہر دور میں تعلیم کبھی بھی ہماری ترجیح نہیں رہی۔ آج تعلیم کے معیار اور خواندگی کے تناسب میں ہمارے ملک کا شمار دنیا کے پسماندہ ترین ممالک میں ہوتا ہے۔ اس کے باوجود ارباب اقتدار تعلیم کی طرف کوءی توجہ دینے پر تیار نہیں، یہ بات بھی سب پر عیاں ہے کہ حکومت وقت تعلیم کی ترقی کے لءے جو مہم چلاتی ہے اس کا مقصد بین الاقوامی برادری خصوصا اقوام متحدہ کو مطمعن کرنا ہوتا ہے جو پاکستان میں تعلیم کی سہولتوں کے فقدان پر اپنی تشویش کا اظہار اکثر و بیشتر کرتے رہتے ہیں۔ قومی اور صوباءی حکومتیں اس مہم کے ذریعے زیادہ سے زیادہ بین الاقوامی امداد حاصل کرنے میں تو کامیاب ہو جاتی ہیں لیکن اس امداد کو صحیح مصرف میں خرچ نہیں کیا جاتا، نتیجتا وہ امداد حکومتی اللے تللوں اور اشتہار بازی کی مہم میں ختم ہوجاتی ہے اور تعلیم کے شعبہ جات میں صرف اجلاسوں کی کارواءیوں تک ہی فنڈ کا استعمال عمل میں آتا ہے۔
آج بھی ہمارا تعلیمی نظام ایک تجربہ گاہ بنا ہوا ہے اور مزے کی بات یہ ہے کہ اس تجربہ گاہ میں تجربے بھی وہ لوگ کررہے ہیں جن کا تعلیم سے کوءی واسطہ ہی نہیں۔ صرف ذاتی تعلق اور اثر و نفوذ کی بنا پر انہیں اس شعبہ میں طبع آزماءی کا موقع دیا جاتا ہے کیونکہ بین الاقوامی امداد اور حکومتی بجٹ کو کہیں نہ کہیں استعمال بھی تو کرنا ہے اور اس کا نتیجہ پوری قوم اور اقوام عالم کے سامنے ہے کہ آج تک پاکستان میں کوءی تعلیمی نظام جاری نہ ہوسکا اور آنے والی ہر نءی حکومت نےنظام تعلیم میں رخنہ اندازی کرکے سرے سے نظام کا ستیاناس کردیا ۔ یہی وجہ ہے کہ وطن عزیز میں خواندگی کا تناسب انتہاءی کم ہے اور خواندہ افراد میں ان کو بھی شامل کیا جاتا ہے جو صرف اپنا نام لکھنا جانتے ہیں۔
آنے والی ہر حکومت نے یہ دعویٰ کیا کہ تعلیم ان کی ترجیحات میں شامل ہے (خواہ آخری ہی ہو) لیکن اس کے لیے انہوں نے اپنی ساری توجہ سابقہ پالیسی کو ختم کرنے اور نءی حکمت عملی تشکیل دینے پر صرف کردی اور انہوں نے اساتذہ سے مشاورت کرنےکی بجاءے اپنے من پسند ارکان کو محکمہ تعلیم کے بجٹ پر تعینات کیا۔
یہ بات بھی دلچسپی سےخالی نہ ہوگی کہ ہر حکومت نے سابقہ حکمرانوں کی ایک حکمت عملی کو تسلسل سے جاری رکھا بلکہ اس میں ہر دور میں اضافہ کیا اور وہ ہے اساتذہ کا استحصال۔ ہر حکومت نے اساتذہ کرام کے استحصال کو اپنی پالیسی کا حصہ بنایا اور اگر پاکستان کے تعلیمی ڈھانچے کا جاءزہ لیا جاءے تو ایک حقیقت سب پر عیاں ہوجاتی ہے کہ پاکستان میں جس قدر استحصال اساتذہ کا کیا گیا شاید ہی کسی اور طبقہ ملازمین کے ساتھ ایسی زیادتی کی کوءی مثال سامنے آءے۔

غلامی کے خوگر حکمران اور بے سُرے ”اسلامی“ موٴذن!….روزن دیوار سے… عطا الحق پاسمی

ایک شخص کے ہاتھ میں کہیں سے ایک روایتی چراغ لگا جس کے رگڑنے سے ایک تابعدار قسم کا جن برآمد ہوا اور اس نے کورنش بجا لاتے ہوئے کہا ”میرے آقا کیا حکم ہے؟“ مگر ساتھ ہی اس جن نے یہ وضاحت کردی کہ وہ گریڈ 14کا جن ہے چنانچہ وہ کوئی چھوٹا موٹا کام ہی کرسکتا ہے نیز اس کے بس میں اپنے آقا کی صرف ایک خواہش پوری کرنا ہے۔ آقا نے کہا ”ٹھیک ہے۔ تم یہ کرو کہ اسلام آباد سے واشنگٹن تک ایک پل بنا دو“ جن نے دست بستہ عرض کی ”میرے آقا! اسلام آباد اور واشنگٹن کے درمیان پہلے ہی بے شمار پل ہیں اب آپ ایک اور پل کیوں بنانا چاہتے ہیں؟ ویسے بھی میں نے آپ سے عرض کیا تھا کہ میں بہت معمولی قسم کا جن ہوں یہ کام میرے بس سے باہر ہے، چنانچہ اگر آپ کوئی متبادل خواہش بتائیں تو مجھے تعمیل ارشاد میں خوشی محسوس ہوگی۔“ یہ سن کر چراغ کے مالک نے کہا ”ٹھیک ہے۔ تم یوں کرو کہ میرے صرف ایک سوال کا جواب دے دو، سوال یہ ہے کہ یہ عورت ذات کیا چیز ہے؟“ جن نے یہ سن کر ایک لمحہ کے لئے توقف کیااور پھر بولا ”میرے آقا! وہ پل یک طرفہ بنانا ہے یا دو طرفہ بنانا ہے؟“

سبق ناتمام—ھاروں رشيد

جنرل محمد ضیاء الحق نے افغانستان میں سوویت یونین کے خلاف اپنی جنگ جیت لی تھی پھر وہ قتل کیوں کر دیئے گئے۔ کیا اس کے سوا بھی ان کا کوئی جرم تھا کہ وہ فتح کے تمام ثمرات امریکہ کی جھولی میں ڈالنے پر آمادہ نہ تھے اور کیا انہوں نے اس کے سوا بھی کسی حماقت کا ارتکاب کیا تھاکہ اپنی قوم کو انہوں نے اعتماد میں نہیں لیا تھا۔ کیا ابھی اس نکتے پر غور کرنے کا وقت نہیں آیاکہ افراد اور اقوام غلطیوں سے نہیں، اپنی غلطیوں پر اصرار سے تباہ ہوتی ہیں؟
صدر زرداری کو ٹوکیو میں دہشت گردی کے خلاف آموختہ دہراتے دیکھنا تکلیف دہ تھا۔ ٹوکیو میں ٹی وی کے نمائندے سے یہ سوال کہ "جاپان اور امریکہ کے علاوہ کون کون سے ممالک پاکستان کو فراخدلی سے مدد دیں گے" اس سے بھی زیادہ اذیت ناک۔ کیا ہم، دنیا کی سب سے زیادہ سر سبز زمین پر بسنے والے لوگ ، دنیا کے بھکاری ہیں؟ کرہٴ ارض پر سب سے زیادہ فی کس زیرِ کاشت رقبے کا ملک، دنیا میں سب سے بڑے نہری نظام کی حامل قوم۔ کیا اب کشکول ہی ہماری علامت، شناخت اور پہچان ہے۔ زخموں پر نمک واشنگٹن پوسٹ میں چھپنے والی رپورٹ کا ایک پیراگراف ہے"اگر پاکستان کی حالت اسی طرح خراب ہوتی گئی تو اس منظر کو تصور میں لانا مشکل نہیں، جس میں جنرل کیانی جنرل مشرف بن جائیں گے اور باقاعدہ طور پر اقتدار پر قبضہ کر لیں گے… مگر اپنے" دوست مائیکل ملن "کو اطلاع دیئے بغیر نہیں کہ صورتِ حال ان کے قابو میں ہے اور جس قدر جلد ممکن ہوگا وہ جمہوریت بحال کر دیں گے "۔

گھڑیاں آگے۔ ۔ ۔ قوم پیچھے۔۔۔۔ سردار نعیم خان

پاک سرزمین کے منتخب پارلیمنٹ کی وسیع البنیاد کابینہ پھر سے تشریف فرما ہوئی اور کئی ایک اہم فیصلے کئے جن میں انتہائی اہم فیصلہ گھڑیاں آگے کرنا بھی تھا (میں گھڑیاں آگے کرنے کا لفظ استعمال کروں گا کہ وقت تو ہم آگے کرنے سے رہے میں اس کو اہم فیصلہ اس لئے بھی قرار دے رہا ہوں کہ شاید ابھی کابینہ کا اجلاس جاری ہی تھا کہ تمام ٹی وی چینلز نے اس فیصلے کی فوٹیج چلانا شروع کردی یعنی سب کے لئے اہم ترین فیصلہ شاید یہی تھا گھڑیاں آگے کرنے کی توجیح یہ تھی کہ اس سے بجلی کی اٹھائیس سو(2800) میگا واٹ بچت متوقع ہے اس سے مجھے گزشتہ برس کی یہی ریہرسل یاد آرہی ہے کہ جب گھڑیاں آگے کرنے کا حکومتی فیصلہ ہوا تو ایک اخبار نے کارٹون چھاپا جس میں ایک کردار جمال دین لگاتار گھڑی کے ساتھ الجھا ہوا ہے بیوی کے استفسار پر جمال دین کہتا ہے کہ وہ گھڑی لگاتار آگے دوڑا رہا ہے چونکہ حکومت کہتی ہے اس سے بجلی کی بچت ہوگی اور عین اسی وقت جمال دین کے بجلی، بلب، پنکھے، فریج وغیرہ بھی آن رہتے ہیں کئی ہماری بچت بھی ایسی ہی نہ ہو چونکہ بجلی بچت تو کہیں نظر نہیں آئی سوائے حکومتی اعداد وشمار کے اور یہ اعداد وشمار تو ایسے ہی ہوتے ہیں کہ جنہیں ہر نئی آنے والی حکومت غلط قرار دیتی ہے اور جب وہ غلط قرار دیتی ہے تو پرانی حکومت اسے باز پرس کون کرے اور اگر کرے بھی تو وقت کا پہیہ کیسے گھومے؟

محبت نامے کا جواب…!,,,,شیخ رشیداحمد

برادرم نذیر ناجی۔ السلام علیکم۔ سویرے سویرے آپ کا محبت نامہ پڑھا۔ آپ نے میرے کندھے پر بندوق رکھ کر امریکن شہریت یافتہ پاکستان کے سفیر کی شان میں اپنے دو قیمتی کالم سیاہ کر دیئے جناب والا۔
1۔ آپ نے مجھ پر الزام لگایا ہے کہ نواز شریف کی دونوں دفعہ بے وقت رخصتی کا میں ذمہ دار ہوں، حالانکہ میں نے سابق صدر مشرف کی نہ تعیناتی کا مشورہ دیا اور نہ ان کی برطرفی کے احکامات میرے مشورے سے ہوئے۔
2۔ برصغیر کی سب سے مہنگی تقریر آپ نے دوبئی اور بہاولپور کے ہوائی سفر میں ان کو لکھ کر دی۔ اگر آپ کو نواز شریف نے کالم نگاروں کی میٹنگ میں نہیں بلایا، تو آپ اس کو خوش کرنے کے لئے مجھے ” جاتی امرا “ جانے کے جتن “ سے کیوں نواز رہے ہیں۔ خدا وہ وقت نہ لائے جب میں کسی کے در پر جانے کے لئے جتن کروں ، وہ چاہے جاتی امرا ( رائے ونڈ ) ہی کیوں نہ ہو۔
3۔ جہاں تک پرویز مشرف کے ہاتھ باندھ کر اقتدار سے نکالنے کا الزام مجھ پر لگایا ہے، تو گزارش یہ ہے کہ نواز شریف نے ٹکٹ نہ دے کر مجھے صدر مشرف کی طرف خود دھکا دیا۔ صدر مشرف کو اقتدار سے NRO اور لال مسجد نے نکالا اور لال مسجد پر میرے شدید اختلافات کی وجہ سے مجھے ریلوے میں بھیج دیا گیا، جس پر آپ نے خوشی کا اظہار کیا کیونکہ میں نے آپ کے ساتھ کبھی نیکی نہیں کی تھی اور آج NRO پر نواز شریف بھی خاموش ہیں اور کئی دوسرے اور بھی کیونکہ حقیقی حکمرانوں کا یہی حکم ہے اور سب مجھے طعنہ دیتے ہیں کہ میں جلا وطنی اور جیل جانے والوں میں نہیں تھا، تو عرض ہے کہ یہ خودساختہ جلاوطنی اور تحریر زدہ روانگی سیاستدانوں کا شیوہ نہیں اور اس خودساختہ جلاوطنی پر جس طرح عمل کروایا گیا میں اس سے واقف ہوں۔
4۔ آپ نے میری آصف زرداری سے ملاقات اور مشورہ کا بھی ذکر کیا ہے۔ آپ اس ملک کے اکلوتے کالم نگار ہیں جو اسلام آباد سے واپسی پر ان کے لئے ” سب اچھا “ لکھتے ہیں۔ آپ ان سے پوچھ سکتے ہیں کہ میں نے انہیں پہلا اور آخری مشورہ یہی دیا تھا کہ شہباز شریف کو نا اہل قرار نہ دیا جائے، ورنہ انہیں سخت نقصان ہوگا اور وقت نے ثابت کیا کہ صدر آصف زرداری کو سخت نقصان پہنچا اور کچھ لوگ ملکی اور غیر ملکی طاقتوں کا فرمان مان کر ہیرو بن گئے۔

پاک افغان نئی امریکی پالیسی مسئلہ کشمیر حل کئے بغیر کامیاب نہیں ہوسکتی،مشرف

شنگھائی(مانیٹرنگ ڈیسک) سابق صدر جنرل پرویز مشرف ریٹائرڈ نے کہا کہ امریکی صدر براک اوبامہ کی پاکستان اورافغانستان کے بارے میں نئی حکمت عملی اس وقت تک کامیاب نہیں ہو سکتی جب تک اس میں بھارت کو شامل نہ کیا جائے اور مسئلہ کشمیر حل نہ کیا جائے۔ چین کے شنگھائی انسٹی ٹیوٹ میں طلبہ سے خطاب میں پرویز مشرف نے کہا کہ افغانستان کے بارے میں امریکی صدر براک اوبامہ کی نئی حکمت عملی سے مطلوبہ نتائج حاصل ہونے کی توقع ہے تاہم بھارت کی شمولیت کے بغیر تمام کوششیں نامکمل ہیں۔

پاک امریکہ تعلقات نازک موڑ پر!۔۔۔۔ نجم سیٹھی

ہمارے لئے رونے اور دشمنوں کے لئے خوشی کا مقام ۔۔۔۔ سلیم صافی

پالیسیاں تشکیل پاگئیں اور ان کے خدوخال بھی واضح ہونے لگے ہیں ۔ امریکہ کی نئی حکومت کی پالیسی بھی سامنے آنے لگی اور القاعدہ کی زیرقیادت مزاحمت کرنے والوں کی بھی دونوں اس نتیجے تک پہنچے ہیں کہ میدان جنگ پاکستان کو بناناہو گا ۔ امریکی ڈرونز کا رخ بھی پاکستان کی طرف ہے اور فدائین کے لشکر بھی پاکستانی شہروں کا رخ کررہے ہیں جنگ ہوگی امریکہ اور اس کے مخالف عربی اور عجمی مخالفین کی ،لیکن میدان بنے گا پاکستان اور مریں گے پاکستان کے ستم رسیدہ مظلوم پاکستانی ۔ گھر اجڑیں گے تو مسلمان پاکستانیوں کے اور جنازے اٹھیں گے تویہاں سے اٹھیں گے۔ القاعدہ کے تعاقب میں ڈرون حملوںکا نشانہ بھی اسلام کے شیدائی قبائلی ہوں گے اور اسلام آباد ، پشاور یا لاہور میں خودکش حملے کی صورت جو بدلہ لیا جائے گا،اس کا نشانہ بھی یہی لوگ ہوں گے (اسلام آباد میں ایف سی کیمپ پر حملے کے نتیجے میں مرنے والے تمام ایف سی کے سپاہی بیٹنی قبیلے کے پختون تھے) ۔ یہ ہے ہماری جرنیل صاحبان اور سیاسی و مذہبی قیادت کی پالیسیوں کا نتیجہ ۔یہی ہماری منافقتوں کا صلہ ہے بلکہ شاید یہ مکافات عمل ہے جس کا اب ہمیں سامنا کرنا پڑے گا۔ اب بھی کچھ لوگ اس غلط فہمی کے شکار ہیں کہ وہ اور ان کے گھر بچے رہیں گے لیکن میرا نہیں خیال کہ کوئی بچ سکے گا۔اب سب قومیتیوں ، سب طبقات اور سب شخصیات کو اپنا اپنا حصہ مل کے رہے گا۔