اُٹھیں اس سے پہلے کہ بہت دیر ہو جائے

کس سے منصفی چاہیں … انصار عباسی

پاکستان کو ہم نے بیرونی طاقتوں کے حوالے کر دیا ہے۔ کوئی دوسرا ملک یہاں طالبانائزیشن اور عسکریت پسندی کو ہوا دے رہا ہے تو کوئی دہشت گردی اور خودکش دھماکوں کے پیچھے ہے۔ ایک طرف شیعہ سنّی فسادات کرائے جا رہے ہیں تو دوسری طرف دیوبندی اور بریلوی طبقہ فکر کو آپس میں لڑانے کی سازشیں کی جا رہی ہیں۔ اگر بلوچستان میں علیحدگی پسندوں کی پشت پناہی کی جا رہی ہے تو افغانستان کے راستے قبائلی علاقوں اور صوبہ خیبرپختونخواہ کے ذریعے پورے ملک میں دہشت گردی کے ایک ایسے فتنے کا بیج بویا جا رہا ہے جس نے پہلے یہاں ہر شخص کا سکون تباہ کر دیا ہے اور ہر طرف آگ اور خون کی ہولی کھیلی جا رہی ہے۔ بیرونی طاقتیں جہاں نان اسٹیٹ ایکٹرز (Non-state Actors) کے ذریعے پاکستان کے اندر اپنا گھناؤنا کھیل کھیل رہی ہیں، وہیں حکومتی سطح پر بھی ہمارے فیصلوں پر وہ اس قدر اثر انداز ہو رہے ہیں کہ اب تو ہماری معیشت، سیاست اور داخلہ و خارجہ پالیسی کے فیصلے بھی باہر ہونے لگے ہیں۔ ہماری حالت زار یہ ہے کہ اپنے بیرونی آقاؤں کی خوشنودی کے لیے ہم نے امریکی ڈرونزکو پاکستان کی حدود کے اندر حملے کرنے کی اجازت دے رکھی ہے۔ مشرف دور میں یہ ڈرون حملے کبھی کبھار ہوتے تھے مگر اب تو روز کا معمول بن چکے ہیں۔ ہم نے اپنی سالمیت اور خودمختاری کا سودا اس حد تک کر لیا ہے کہ آج امریکی فیصلہ کرتے ہیں کہ ہمارے قبائلی علاقوں میں کون ”دہشت گرد“ ہے اور کس کو ڈرون حملہ سے مارا جانا ہے۔ امریکہ کی اس ریاستی دہشت گردی پر کوئی بولنے والا نہیں مگر ان ڈرون حملوں اور امریکہ نواز پالیسیوں کے نتیجے میں پیدا ہونے والی شدت پسندی کو کچلنے کے لیے امریکہ کے ہی تجویز کردہ ملٹری آپریشن پر سارا زور دیا جاتا ہے جو دہشتگردی میں مزید اضافہ کا باعث بن رہا ہے۔ امریکہ، برطانیہ، بھارت اور اسرائیل تو چلیں جو ہمارے ساتھ کر رہے ہیں، اس کی وجہ سمجھ میں آتی ہے کہ وہ ایک مسلمان ملک جس کے پاس ایٹمی طاقت بھی ہو، کیسے برداشت کر سکتے ہیں مگر یہاں تو کچھ ہمارے برادر اسلامی ممالک بھی شیعہ سنّی فسادات کو ہوا دینے میں لگے ہیں۔ سب کو معلوم ہے کہ کون کیا کھیل کھیل رہا ہے مگر یہ سب کچھ روکنے کی کوئی تدبیر ہے نہ سوچ۔ سارا زور ہر دھماکہ کے بعد خودکش بمبار کے سر کو ڈھونڈنے پر ہوتا ہے۔ مرض کو جڑ سے پکڑنے کی کوئی سوچ ہی نہیں۔ ہماری پارلیمنٹ ایک متفقہ قرارداد کے ذریعے ڈرون حملوں کی مذمت کرتی ہے۔ امریکہ کی دہشتگردی کے خلاف جنگ اور جنرل پرویز مشرف دور میں اپنائی جانے والی پالیسیوں کو ملک میں دہشتگردی ،طالبانائزیشن اور عسکریت پسندی میں اضافہ کا سبب جانتے ہوئے ازسرنو پالیسی بنانے پر زور دیتی ہے مگر حکومت بیرونی دباؤ پر بالکل اس کے برعکس عمل درآمد کرتی ہے، جس سے آگ اور خون کے اس کھیل میں مزید شدت آ جاتی ہے۔ پاکستان کو بیرونی طاقتوں نے ایک ایسی شطرنج کی بساط بنا دیا ہے جس پر چلنے والے تمام مہروں کو باہر سے کنٹرول کیا جاتا ہے۔ اس صورتحال میں پاکستان تیزی سے ہمارے ہاتھوں سے نکل رہا ہے۔ اپنی نا اہلیوں اور بیرونی سازشوں کی وجہ سے بحیثیت قوم آج ہم انتہائی نااتفاقی کا شکار ہو چکے ہیں اور ہمارا اتحاد ریزہ ریزہ ہو چکا ہے۔ ہم اپنے ہاتھوں سے اس ملک کی تباہی کا سامان پیدا کر رہے ہیں۔ بربادی اور رسوائی کی تمام نشانیاں نمایاں ہیں اور سب پر خطرہ واضح ہے۔ خواہ سیاستدانوں سے بات کریں یا دانش وروں سے، فوج کے اعلیٰ افسران سے اس ملک کے مستقبل کے متعلق پوچھیں یا وزیروں و مشیروں سے اس پر ان کا نکتہ نظر جاننے کی کوشش کریں، ہر طرف مایوسی کے بادل چھائے ہوئے ہیں۔ حکمران انتہائی درجہ کی سردمہری کا مظاہرہ کر رہے ہیں جبکہ باقی سب بھی تماشائیوں کی طرز کا رویّہ اپنائے ہوئے ہیں۔ سب اپنے ہی گھر میں لگی آگ کا تماشا دیکھ رہے ہیں۔ ایسے لوگ جو واقعتاً ان سنگین حالات سے فکر مند ہیں، وہ بھی کچھ کرنے سے قاصر ہیں۔ یقیناً یہ اس ملک کی بدقسمتی ہے کہ صدر آصف علی زرداری اور وزیراعظم یوسف رضا گیلانی جیسے غیر سنجیدہ افراد ایک ایسے وقت میں ہمارے حکمران ہیں جب ہمیں انتہائی مدبر، مخلص اور سنجیدہ لیڈر شپ کی ضرورت ہے تاکہ ہم اپنے وطن کو اس دلدل سے نکال سکیں، جس میں ہم تیزی سے دھنستے جا رہے ہیں۔ یہ بات نوازشریف بھی کرتے ہیں یہی خیال الطاف حسین، سید منوّر حسن اور عمران خان کا بھی ہے۔ پیپلز پارٹی کے رہنماؤں کی ایک بڑی تعداد بھی ان حالات سے انتہائی پریشان ہے۔ مگر اس پریشانی اور فکر کا پاکستان کو کیا فائدہ، اگر کوئی عملی اقدام نہیں اٹھایا جاتا۔ یہ وقت ہے سرجوڑ کر بیٹھنے کا اور ان مسائل کو حل کرنے کا جو پاکستان کی بنیادوں کو دیمک کی طرح تیزی سے چاٹ رہے ہیں۔ اگر زرداری اور گیلانی ان مسائل کو حل کرنے میں سنجیدہ نہیں تو باقی سب مل کر کیوں نہیں بیٹھتے اور ایک ایسا لائحہ عمل طے کرتے، جس سے اس قوم کے مستقبل کو محفوظ بنایا جا سکے۔ اگر ایسا نہ ہوا تو یقین رکھیں کہ تباہی ہمارا مقدّر ہو گی کیونکہ یہ اللہ تعالیٰ کا وعدہ ہے کہ وہ اُس قوم کی حالت نہیں بدلتا جو خود اپنی حالت بدلنے کے لئے کوشش نہ کرے۔ اگر ہم سب تماش بین بنے رہے تو پھر خودکش دھماکے، فرقہ وارانہ دہشت گردی اور ٹارگٹ کلنگ بڑھتی رہے گی اور بیرونی طاقتیں اپنا گھناؤنا کھیل کھیلتی رہیں گی ۔یہ وقت ہے کہ ہم اپنے ذاتی مفادات کو ایک طرف رکھ کر اس ملک کو بچانے کی کوشش کریں، چاہے اس کی خاطر ہمیں اپنی جانوں کی ہی قربانی کیوں نہ دینی پڑے۔ دی نیوز کے رپورٹر عمر چیمہ نے جس انداز میں مبینہ ریاستی غنڈہ گردی کا سامنا کیا اور تمام تر تشدّد اور بے حرمتی کے باوجود وہ جس طرح اب بھی پرعزم ہے کہ وہ اپنے ملک اور قوم کے مستقبل کے لئے دیانت داری اور نڈر طریقے سے اپنی صحافتی ذمہ داریاں ادا کرتا رہے گا، یہ پیغام ہے تمام سیاسی رہنماؤں، دانش وروں اور اہل فکر کے لئے وہ بھی سب اٹھ کھڑے ہوں، اس سے پہلے کہ بہت دیر ہو جائے۔

http://search.jang.com.pk/details.asp?nid=465303